Skólinn

Nýnemar boðnir velkomnir í ME

Undanfarin ár, eða svo lengi sem elstu menn muna, hafa svokallaðar busavígslur tíðkast við flesta framhaldsskóla landsins. Í busavígslunum eru nýnemar „vígðir“ inn í skólann af eldri nemendum og hefur sú vígsla oft gengið út á það að niðurlægja nýnemana og láta þá sýna hinum eldri nemum lotningu. Í busuninni hafa nýnemarnir stundum verið settir í drullubað, látnir innbyrða einhvern ógeðslegan graut og látnir ganga í gegnum bæinn undir hrópum og köllum eldri nemenda. Þeir nýnemar sem ekki hafa látið segjast hafa svo sætt enn frekari niðurlægingu og jafnvel meiðingum. Þótt busunin sé skemmtileg og spennandi fyrir flesta nýnema getur hún verið öðrum hreinasta kvöl. Sumir hafa meira að segja brugðið á það ráð að mæta ekki í skólann á busadaginn og aðrir hafa jafnvel valið skóla þar sem busun er ekki leyfð.

Litið hefur verið á busunina sem hefð sem erfitt væri að hætta við eða breyta. En í sumar sendu Skólameistarafélag Íslands og Félag íslenskra framhaldsskóla frá sér ályktun þar sem hvatt var til að tekið væri vel á móti nýnemum svo þeir fengju það á tilfinninguna að þeir væru velkomnir í skólann.

Við Menntaskólann á Egilsstöðum voru nýnemar boðnir velkomnir fimmtudaginn 28. ágúst sl. með nýnemaskemmtun í frábæru veðri  í Selskógi þar sem starfsfólk skólans, eldri nemendur og nýnemar fóru í leiki og að því loknu var boðið upp á hressingu. Allir skemmtu sér vel og flestir tóku þátt. Einnig var haldið nýnemaball á föstudagskvöldið en þá höfðu nýnemarnir ekki þurft að þola alls kyns hremmingar fyrr um daginn eins og hingað til hefur tíðkast.

Nýnemar ME þurftu því ekki að kvíða niðurlægingu og öðrum leiðindum þetta árið og er vonandi að hin hefðbundna busavígsla sé liðin undir lok.

Hafðu samband

v/Tjarnarbraut
700 Egilsstaðir
Netfang: skrifstofa@me.is
Sími: 471-2500
Kt. 610676-0579