Erlent samskipti - Erasmus og AFS samstarf
Við Menntaskólann á Egilsstöðum hefur frá upphafi verið lögð áhersla á erlent samstarf og samskipti. Helsta markmið þeirrar samvinnu er að víkka sjóndeildarhring nemenda og starfsfólks, auka menningarlæsi og alþjóðalegt samstarf, ásamt því að bæta tungumálakunnáttu nemenda.
Erasmus+ verkefni
ME er með Erasmus+ aðild sem tryggir nemendum og starfsfólki gott aðgengi að ýmis tækifærum í erlendu samstarfi. Skólinn getur sótt um Erasmus+ styrki til að fara út með nemenda- og/eða kennarahópa í ýmis konar samstarfs- og endurmenntunarverkefni. Nemendur og starfsfólk er hvatt til að hafa samband við verkefnastjóra erlendra samskipta með hugmyndir að verkefnum.
Verkefnisstjóri erlendra samskipta og Erasmus+ verkefna við skólann er Margaret Anne Johnson.
Lesa má nánar um samstarfsverkefni síðustu ára hér fyrir neðan.
Maí 2026: Starfsbrautarnemendur í Róm
Apríl 2026: Positive thinking, positive communication, positive schoolspace - endurmenntun kennara í Barcelona
Janúar 2026: Endurmenntun - gervigreind í Barcelona
Haust 2025: Endurmenntun - gervigreind í Ungverjalandi
Apríl 2025: Ferð með nemendafélagi ME til Belgíu
2021-2022: F:ire & Ice
Erasmus verkefnið F:ire&ice var ungmennaskiptaverkefni, sem unnið var í samstarfi Menntaskólans á Egilsstöðum, Ungmenna- og íþróttasambands Austurlands og írsku ungmennasamtakanna YMCA. Nemendur í ME sem voru skráð í 5 eininga útivistaráfangann "Útivist og sjálfsefling" á tímabili verkefnisins voru þátttakendur ásamt hópi ungmenna frá YMCA á Írlandi. Útivistaráfanginn hefur þá sérstöðu að megináherslur hans voru á að efla sjálfsþekkingu nemenda, trú á eigin getu, samskiptahæfni og tengsl þeirra við náttúruna og sjálfan sig. Hugmyndafræði F:ire&ice byggir á náttúrumeðferð, reynslunámi, jákvæðri sálfræði, styrkleikaþjálfun, áskorunum og ævintýrum. Íslenski hópurinn fór út til Írlands í heimsókn og sá írski til Íslands.
2018-2021: Management game for future European managers
Samstarfsverkefni skóla frá Íslandi, Spáni, Hollandi, Ítalíu og Finnlandi undir yfirskriftinni "Management game for future European managers". Verkefnið tók 36 mánuði og hófst á haustönn 2018 með upphafsfundi á Ítalíu. Verkefnið snérist í grunninn um að nemendur lærðu að stofna fyrirtæki, allt frá því að kynna sér lagalega þætti þess, vinna hugmyndavinnu og búa til viðskiptaáætlun. Með því að taka þátt gafst nemendum frábært tækifæri til að víkka sjóndeildarhringinn, læra nýja hluti og kynnast jafnöldrum sínum og menningu víða um Evrópu. Í hverri heimsókn bjuggu erlendir nemendur heima hjá nemendum í heimaskóla á meðan á dvölinni stóð auk þess sem farið var í margs konar ferðir og fjölbreyttrar afþreyingar notið.
Comenius 2010-2012: Young Europeans Make a Greener Europe
Comenius-samstarfsverkefnið "Young Europeans Make a Greener Europe" snérist um að auka vitund nemenda á ábyrgð sinni í orkunotkun og hvernig þeir gátu dregið úr kolefnisspori sínu, m.a. með því að bera sig saman við nemendur frá öðrum þátttökulöndum. Þátttakendur kynntu sér reglur Evrópusambandsins um orkunotkun og kolefnislosun og fjölluðu um endurvinnslu og endurnýtingu. Nemendur miðluðu upplýsingum og unnu verkefni milli landanna og hittust í heimsóknum í öllum þátttökulöndunum. Þau lærðu að virða mismunandi skoðanir og aðstæður en vinna að sama markmiði.
Í verkefninu voru ýmsar faggreinar samþættar, s.s. náttúrufræði, félagsfræði og tungumál. Með því móti gafst mörgum kennurum úr hverjum skóla, og fjölbreyttum hópi nemenda, kostur á að taka þátt í verkefninu. Nemendur fengu einnig góða þjálfun í notkun upplýsingatækni sem ýtir undir og aðstoðar samskipti þeirra.
Samstarf ME við AFS um skiptinám á skólastyrk
Frá árinu 2023 hefur ME, ásamt fjórum öðrum íslenskum framhaldsskólum tekið þátt í verkefni í samstarfi við AFS þar sem nemendum skólanna gefst kostur á að sækja um að fara í 3 eða 5 mánaða skiptinám í Evrópu á 85% skólastyrk í gegnum Erasmus+. Þannig þurfa nemendur ekki að borga nema um 200.000 fyrir 3 mánaða dvöl sem annars kostar um 1.450.000. Það eru þó nokkur lönd sem taka á móti nemendum í þessu verkefni en getur verið mismunandi á milli anna. Síðustu ár hafa ME-ingar farið til Ítalíu, Slóvakíu, Tékklands, Tyrklands, bæði frönsku- og flæmskumælandi hluta Belgíu, og Ungverjalands. Í umsóknarferlinu er ekki hægt að velja sér land og nemendur sem eru tilbúnir til að fara "hvert sem er" ganga fyrir. Sérstök áhersla er einnig lögð á að veita nemum með færri tækifæri á að fara í skiptinám. Búseta í stjálbýli eða takmörkuð fjárráð falla meðal annars þar undir en tekið er við öllum umsóknum svo ekki hika við að sækja um.
Nemendur geta sótt um 2x á ári. Yfirleitt er opið fyrir umsóknir fyrir vorannardvöl (janúar-apríl/maí) á haustin og fyrir haustannardvöl (ágúst-nóv) á vorin.
Samstarfið veitir ómetanleg tækifæri fyrir ME-inga á aldrinum 16-18 ára. Þú ættir að sækja um ef þig langar til að prófa að búa í öðru landi í Evrópu og upplifa hvernig það er að vera unglingur þar, læra nýtt tungumál, upplifa nýja menningu, verða hluti af fósturfjölskyldu og fara í nýjan skóla.
Tengiliður vegna samstarfs ME og skiptináms á vegum AFS er Nanna Imsland, náms- og starfsráðgjafi